متنساش الفقير
متنساش الفقير هى حمله دشنها شبان مصريين خيرين صغيرين معظمهم تحت 18 سنه بينتمو لجمعيه اسمها " احياء " لتأكيل الفقرا لحمه فى العيد الكبير 2011. الشبان سمو حملتهم " لحمة العيد " و هدفهم تأكيل أكتر من 1500 اسره فقيره لحمه فى العيد الكبير. معظم الاسر الفقيره دى فى منطقه فى القاهره اسمها " بطن البقره " و هى منطقه فى غاية الفقر بيحاول الشبان المصريين انتشال اهلها من الفقر و الجوع و المرض.
المسئول عن الحمله " احمد داعور " مجرد شاب صغير عنده 17 سنه بيقول انهم مجرد مجموعه من شبان الاعدادى و الثانوى و انهم ابتدو يعملو الخير و هما لسه عندهم 15 سنه لما حسو بالمسئوليه تجاه المصريين العايشين تحت خط الفقر ، و اختارو منطقة بطن البقره و ساهمو فى مشاريع كتيره فى الاربع سنين اللى فاتو و كان اكبرها حمله عملوها سنة 2010 قدرو يلمو فيها 45 الف جنيه تمن اربع عجول و قدر بقية اعضاء الفريق انهم يلمو عليهم مبلغ تانى فقدرو يجيبو 15 عجل وزعو لحمها على عدد كبير من الاسر الفقيره. و بيقول احمد ان هدفهم فى 2011 هو لم تمن 15 عجل لتوزيع لحمها على 1500 اسره محتاجه فى منطقة بطن البقره و اماكن فقيره تانيه زى اسطبل عنتر و المنيل القديم ، و انهم فعلا قدرو يجمعو جزء كبير و انهم متحمسين لتكميل مسيرة الخير.
و بيقول " حذيفة داود " اللى عنده 21 سنه ان هدف الفريق بشكل سنة هو التنميه فى منطقة بطن البقره عن طريق مجموعه من المشاريع الثابته التى بيتولى شباب الجمعيه مسئوليتها زى زى المشروعات الصغيره و التعليم و تجويز العرايس. و بخصوص حملة لحمة العيد بيقول ان الحمله بتساعد أكتر من 1500 اسره محتاجه عايشين فى بيوت معدمه مابيدخلهاش من الأكل غير حاجات قليله جداً و ان هدفهم تدخيل الفرحه لقلوبهم فى عيد الأضحى.