الحلوة دى قامت تعجن فى البدريه

الحلوه دى قامت تعجن ف البدريه اغنيه مصريه الفها بديع خيرى و لحنها و غناها سيد درويش

كلمات[تعديل]

الحلوه دى قامت تعجن ف البدريه

و الديك بيــدن كوكو كوكو ف الفجريه

يللا بنا علا باب الله يا صنايعيه

يجعل صباحك صباح الخير يا اسطا عطيـه

.....

طلع الصباح فتاح يا عليم

و الجيـب مافهشى ولا مليــم

مين فى اليومين دول شاف تلطيم

زى الصنايعيه المظاليـم

.....

الصبر امره طال

من بعد وقف الحال

يا اللى معاك المال

برضه الفقير له رب كريم

.....

ما تشد حيلك يا ابو صلاح

اضربها صرمه تعيش مرتاح

خللى تكالك ع الفتاح

يللا بينا الوقت اهو راح

.....

الشمس طلعـت و الملك لله

اجرى لرزقك خليها علالله

ما تشيل ادومك و العـده و يللا

.....

الحلوه دى قامت تعجن ف البدريه

و الديك بيدن كوكو كوكو ف الفجريه

يللا بنا علا باب الله يا صنايعيه

يجعل صباحك صباح الخير يا اسطا عطيه